Almaniyanın sabiq Kansleri Gerhard Şröderin Rusiya ilə danışıqlarda Avropa İttifaqını təmsil edən vasitəçi kimi namizədlik ideyası qəbul edilməyib.

“The Guardian“ın xəbərinə görə, Almaniyanın Avropa məsələləri üzrə naziri Gunter Krichbaum bildirib ki, belə bir vasitəçi “hər iki tərəf üçün qəbul edilən şəxs olmalıdır” və Şröder bu meyara uyğun deyil.

O əlavə edib ki, Şröder keçmişdə “neytral və ədalətli vasitəçi kimi çıxış etmək bacarığını göstərməyib” və onun Vladimir Putinlə yaxın münasibətləri bu rol üçün etibarlılığa zərər verir: “Yaxın dostluq münasibətləri sizi ədalətli vasitəçi kimi qəbul etdirməyə kömək etmir”.

Ukraynanın xarici işlər naziri Andrey Sibiqa da bu təklifi qəti şəkildə rədd edib. O bildirib ki, bu rol üçün daha uyğun namizədlər var: “Xeyr, biz bunu dəstəkləmirik. Bu namizədliyi qətiyyən dəstəkləmirik”.

Avropa İttifaqının xarici siyasət rəhbəri Kaya Kallas da Şröderin Rusiya dövlət şirkətləri ilə əlaqələrini xatırladaraq onun vasitəçi kimi təyin olunmasının mümkün olmadığını bildirib.

.