“Fitch Ratings” 2026-cı il üçün neftin qiyməti üzrə 87 ABŞ dolları/barel proqnozunu dəyişməz saxlayıb, 2027-ci il üzrə proqnozunu isə 5 dollar artıraraq 70 dollar/barelə çatdırıb.

Bunu “Fitch Ratings”in korporativ reytinqlər üzrə EMEA direktoru Jakub Zasada (Jakub) Bakıda keçirilən “Fitch Azərbaycanda” tədbirində bildirib.

O qeyd edib ki, “Fitch” 2026-cı il üçün 87 dollar/barel səviyyəsində qiymət fərziyyəsini yaz aylarında müəyyənləşdirib və son aylarda neft bazarında müşahidə olunan yüksək volatilliyə baxmayaraq bu proqnozu dəyişməyib.

Zasadanın sözlərinə görə, neftin qiyməti iyunun ortalarında təxminən 70 dollar/barelə qədər kəskin ucuzlaşıb. Buna İran və ABŞ arasında anlaşma memorandumunun imzalanması, eləcə də neft axınlarının müharibədən əvvəlki səviyyənin təxminən 75%-nə qədər bərpa olunması təsir edib.

Lakin bu tendensiya uzunmüddətli olmayıb. İyulda hərbi əməliyyatların yenidən başlaması, daha sonra sentyabrda Səudiyyə Ərəbistanında infrastruktura hücumlar neftin qiymətinin 100 dollar/bareldən yuxarı qalxmasına səbəb olub.

“Fitch” rəsmisi Hörmüz boğazından neft daşımalarının davam etməsinin qlobal bazar üçün mühüm əhəmiyyət daşıdığını vurğulayıb. Onun sözlərinə görə, boğaz ətrafındakı vəziyyət dəyişkən olaraq qalır.

Zasada bildirib ki, “Fitch” ABŞ və Yaxın Şərq ölkələrinin gündəlik ən azı 10 milyon barel neftin daşınmasını təmin edə biləcəyini gözləyir. Səudiyyə Ərəbistanının Şərq-Qərb boru kəməri vasitəsilə gündəlik təxminən 5 milyon barel ixrac imkanının da nəzərə alınması qlobal təklifin qorunmasına imkan verir.

Agentliyin proqnozuna əsasən, qlobal neft təklifi IV rübdə gündəlik təxminən 107 milyon barelə, tələb isə 104 milyon barel ətrafına çatacaq. Beləliklə, “Fitch” bazarda təklifin tələbi üstələyəcəyini gözləyir.

Təklifdəki artımın bu il əsasən OPEC-dən kənar istehsalçılar – ABŞ, Braziliya, Qayana və Argentina hesabına formalaşacağı bildirilir. Bu ölkələrdən əlavə hasilatın gündəlik təxminən 1,5 milyon barel, gələn il isə daha 1 milyon barel təşkil edəcəyi gözlənilir.

Zasada əlavə edib ki, bu ilin II rübündə qlobal neft tələbində nəzərəçarpacaq azalma müşahidə olunub. “Fitch” bu il tələbin ötən illə müqayisədə daha aşağı olacağını, 2027-ci ildə isə tədricən gündəlik 104 milyon barel və daha yüksək səviyyələrə qayıdacağını gözləyir.

Fitch Avropada qaz qiymətlərinin tədricən azalacağını gözləyir

“Fitch Ratings” ortamüddətli perspektivdə Avropada təbii qaz qiymətlərinin tədricən azalacağını gözləyir.

Bunu “Fitch Ratings”in korporativ reytinqlər üzrə EMEA direktoru Jakub Zasada Bakıda keçirilən “Fitch Azərbaycanda” tədbirində bildirib.

O qeyd edib ki, agentlik sentyabrda neft və qaz qiymətləri üzrə proqnozlarını yeniləyərkən Avropanın TTF qazı üzrə qiymət fərziyyələrini yüksəldib. Buna əsas səbəb Yaxın Şərqdən LNG tədarükünün azalması olub.

Zasadanın sözlərinə görə, neft daşımalarından fərqli olaraq, LNG tədarükünü alternativ marşrutlarla təmin etmək daha çətindir. LNG tankerlərinin daha bahalı olması və onların sığortalanmasında yaranan çətinliklər daşımaları məhdudlaşdırıb.

O bildirib ki, Qətərdən LNG daşımalarının azalması qlobal bazarda təxminən 50 milyon kubmetr həcmində qaz çatışmazlığına səbəb olub. Bu, müharibədən əvvəlki qlobal LNG ticarətinin təxminən 10%-nə bərabərdir.
Təklifin azalması Avropa və Asiya alıcıları arasında mövcud LNG yükləri uğrunda rəqabəti gücləndirib və TTF qiymətlərinə yüksəldici təsir göstərib.

Zasada qeyd edib ki, sentyabrın sonuna Avropanın qaz anbarlarının doluluğu təxminən 71% olub. Əvvəlki illərin eyni dövründə bu göstərici 80–90% aralığında olub.

“Fitch” hesab edir ki, Avropanın qaz anbarlarında bazarı tarazlaşdırmaq üçün kifayət qədər ehtiyat mövcuddur və təchizatda ciddi fasilə riski aşağıdır. Bununla belə, ehtiyatların əvvəlki illərlə müqayisədə aşağı olması qiymətlərin və volatilliyin yüksəlməsinə səbəb olur.

Agentlik gələcəkdə TTF qiymətlərinin azalacağını gözləyir. Buna ABŞ və Qətərdə yeni LNG istehsal güclərinin istifadəyə verilməsi təsir göstərəcək. Zasada bildirib ki, artıq tikilməkdə olan və təsdiqlənmiş layihələr nəzərə alındıqda, onilliyin sonlarına doğru qlobal qaz bazarında təklif artıqlığı riski yarana bilər.

.