Moskva Rusiya və Ukrayna liderlərinin görüşünü təxirə salmaq üçün danışıqların yeni səviyyəsini təklif edə bilər.
"Report"un Ukrayna KİV-lərinə istinadən verdiyi məlumata görə, bunu Ukrayna Prezidenti Volodimir Zelenski brifinqdə bildirib.
"Onlar (rusiyalılar - red.) yeni səviyyə təklif edə bilərlər. Nə üçün? Hesab edirəm ki, bu, süni surətdə təxirəsalmadır, liderlərin görüşünün təxirə salınmasıdır. Çünki onlar ABŞ-yə konstruktiv olduqlarını göstərmək istəyirlər. Amma onlar konstruktiv deyillər", - V.Zelenski bildirib.
Ukrayna Prezidenti, həmçinin əlavə edib ki, Rusiya sanksiyaların tətbiqini də təxirə salmaq istəyir.
Onun sözlərinə görə, Ukrayna öz növbəsində Rusiyaya qarşı ikinci dərəcəli sanksiyaların tətbiqini istəyir, çünki bu, Rusiya iqtisadiyyatına zərbə ola bilər.
"Tərəfdaşlar bir az tərəddüd edirlər, əlbəttə, rusiyalılarla hələ də hansısa diplomatik əlaqə saxlamaq istəyirlər. Ona görə də rusiyalılar görüşməmək üçün hər şeyi edəcəklər. Mənim fikrimcə, onlar nəsə əldə edibilər, çünki onların ABŞ-də görüşü oldu", - Ukrayna Prezidenti əlavə edib.
.
