Argentina millisinin əfsanəsi Lionel Messi yığmadakı karyerasını başa vurub.
39 yaşlı futbolçu milli komandada son matçını Beninə qarşı keçirib.
Matç Argentinanın 3:0 hesablı qələbəsiylə başa çatıb.
Messi vida görüşündə də məhsuldar oyunu ilə diqqət çəkib. Argentina millisinin kapitanı qarşılaşmada 1 qol vurub və 2 məhsuldar ötürmə edib.
Beləliklə, uzun illər Argentina millisinin formasını geyinən Messi yığmadakı karyerasına rəsmən nöqtə qoyub.
Matçdan sonra azarkeşlərə və komanda yoldaşlarına müraciət edən Messi vida anında uzun müddət danışdığını bildirib:
“Bəlkə də əvvəllər heç vaxt bu qədər uzun danışmamışam. Çünki bu anın bitməsini heç istəmirdim. Amma artıq vidalaşmağın vaxtıdır. Hamınızı çox sevirəm və sizin üçün çox darıxacağam.
Burada oynamaq üçün çox darıxacağam. Hamınızı sevirəm və argentinalı olduğum üçün qürur duyuram. Minnətdar, qürurlu və rahat şəkildə ayrılıram. Hər şey üçün təşəkkür edirəm”.
Messi bundan sonra da Argentina millisinin yanında olacağını vurğulayıb:
“Hamınız üçün çox darıxacağam, amma həmişə yanınızda olacağam. Bu uşaqları və onlardan sonra gələcək hər kəsi dəstəkləyəcəyəm.
Dünya çempionatını, Amerika Kubokunu, ‘Finalissima’nı qazandıq... Bütün bunlara görə inanılmaz dərəcədə tanrıya və sizə minnətdaram”.
Ulduz futbolçu milli komandadakı yolunun yalnız son illərdə qazanılan titullardan ibarət olmadığını xüsusi qeyd edib:
“Amma bu yol yalnız 2022-ci il və ya son dünya çempionatından ibarət deyil. Dünya çempionu olmağımızdan çox əvvəl bu formanı geyinərək mənimlə birlikdə mübarizə aparan çoxlu komanda yoldaşım olub. Onların hər birinin Argentina üçün nə qədər mübarizə apardığına və nələr verdiyinə heç vaxt şübhə etməyin”.
Messi komanda yoldaşlarına inamının hər zaman yüksək olduğunu da söyləyib:
“Hər dəfə meydana çıxanda bilirdim ki, qarşımızda kim olursa-olsun, onunla mübarizə apara bilərik. Yanımdakı döyüşçülərin meydanda hər şeylərini verməyə hazır olduqlarını hiss edirdim”.
Qeyd edək ki, Messi Argentina millisi ilə 2022-ci ildə dünya çempionu olub. O, həmçinin iki dəfə Amerika Kubokunu və “Finalissima”nı qazanıb.
.
