Aşağı yaş qruplarından ibarət Azərbaycan çempionatlarında komandaların səviyyəsinə görə liqalara bölünməsi təklif edilib.
Bu barədə "Report"a açıqlamasında "Neftçi" Futbol Akademiyasının direktoru Cemal Bülbül bildirib.
Bu təklif AFFA-nın Yarışların Təşkili Departamentinin əməkdaşları ilə görüş zamanı irəli sürülüb:
"Turnirlərin keyfiyyətli şəkildə təşkil olunmasını istəyirik. Bəzən elə oyunlar olur ki, 20:0 hesabı ilə başa çatır. Təəssüf ki, oyunçu bu görüşdə inkişaf baxımından heç nə qazanmır. Komandaları turnir cədvəlində mövqeyinə əsasən A, B və C Liqasına bölmək olar. Bərabər səviyyəli kollevtivlərin bir-biri ilə daha çox oyun keçirməsi məqsədəuyğun olar".
C.Bülbül aşağı yaş qruplarındakı futbolçuların klub dəyişməsində də bəzi məsələlərin tənzimlənməli olduğunu diqqətə çatdırıb:
"Məsələn, oyunçu başqa kluba getmək istəyirsə, çox cüzi məbləğ ödənilir. Amma digər xarici ölkələrdə, Türkiyədə elə deyil. Ciddi maliyyə öhdəliyi olmalıdır. Bu məbləğin artırılmasını da xahiş etdik. Oyunçu başqa kluba gedəcəksə, bilməlidir ki, onu böyütmək baha başa gəlir. Məbləğ artırılacağı təqdirdə, futbolçu sərbəst hərəkət edə bilməyəcək. Bu da klubların əlini daha da gücləndirəcək".
Qeyd edək ki, bir neçə gün öncə aşağı yaş qrupları üzrə liqalarda çıxış edən komandaların akademiyalarının texniki direktor və koordinatorları ilə AFFA-nın Yarışların Təşkili Departamentinin əməkdaşları arasında görüş keçirilib.
.
