“Bu gün ilk sərnişinlərini daşımış Bakı–Ağdam–Bakı dəmir yolu reysi Qarabağ iqtisadi rayonunda ictimai nəqliyyatın əlçatanlığını artırmaqla yanaşı,

Ağdam və ətraf rayonların sosial-iqtisadi dirçəlişinə, Azərbaycanın bu bölgədə nəqliyyat imkanlarının genişlənməsinə, əlçatanlığa, bütövlükdə Böyük Qayıdışa mühüm töhfə verəcək”.

"APA-Economics"in Ağdama ezam olunmuş əməkdaşı xəbər verir ki, bunu "Azərbaycan Dəmir Yolları" QSC-nin sədrinin müavini Nicat Quliyev Bakı-Ağdam qatarının fəaliyyətə başlaması münasibətilə keçirilən tədbir zamanı deyib.

"İşğaldan azad olunmuş ərazilərdə dəmiryol infrastrukturunun bərpası tək Bərdə–Ağdam dəmir yolu ilə məhdudlaşmır. Bu xəttin davamı olaraq artıq Ağdam–Xankəndi dəmir yolunun da inşasına başlanılıb. Bu il iyulun 3-də Prezident İlham Əliyev Xankəndi Dəmir Yolu və Avtovağzal Kompleksinin təməlini qoyub. Bu kompleks də gördüyünüz bu bina kimi ən müasir infrastrukturla, innovativ texnologiya və rəqəmsal həllərlə təchiz ediləcək, sərnişindaşıma üçün bütün qabaqcıl imkanlar yaradılacaq. 2026-cı ilin sonunadək həm Ağdam-Xankəndi dəmir yolunun, həm də Xankəndi Dəmir Yolu və Avtovağzal Kompleksinin açılışı planlaşdırılır", - Nicat Quliyev qeyd edib.

Onun sözlərinə görə, Qarabağla yanaşı Şərqi-Zəngəzur iqtisadi regionunda da dəmiryol infrastrukturu bərpa edilir. Horadiz-Ağbənd dəmir yolu xəttinin layihələndirilmə işlərinin 84%-i, tikinti-quraşdırma işlərinin isə 67%-i yekunlaşıb.

"Hazırda xəttin 75-106 km hissəsində torpaq işləri və mühəndis qurğularının inşası aparılır. Layihə çərçivəsində Yuxarı Mərcanlı, Şükürbəyli, Soltanlı, Qumlaq, Həkəri, Mincivan, Bartaz və Ağbənd stansiyalarının tikintisi nəzərdə tutulur. dəmir yolu xətti boyunca körpülər, avtomobil keçidləri, tunellər, qalereyalar və istinad divarları daxil olmaqla, ümumilikdə 553 mühəndis qurğusunun tikintisi həyata keçiriləcək", - Nicat Quliyev vurğulayıb.

Onun sözlərinə görə, Türkiyə Respublikasında da Naxçıvanla sərhəddə Zəngəzur dəhlizinə birləşəcək Qars-Iğdır-Aralıq-Dilucu dəmiryol xəttinin təməli qoyulub. Bu baxımdan, Naxçıvanın dəmiryol infrastrukturunun bərpası ölkəmizin ali rəhbərliyi tərəfindən prioritet məsələ elan edilib və ADY olaraq ən qısa zamanda bu istiqamətdə işə başlamağı planlaşdırılır.

.