Astara Rayon Polis Şöbəsi əməkdaşları İran İslam Respublikasından qaçaqmalçılıq yolu ilə narkotik maddəni ölkəmizə gətirib satmaq istəyən şəxsləri saxlayıb. Əməliyyat məlumatları əsasında Astara şəhər Həzi Aslanov küçəsi 83 ünvanında yaşayan 57 yaşlı Əhliman İmanzadənin yaşadığı mənzilə baxış keçirilib. Mənzildən satış məqsədi ilə kibrit qutularına qablaşdırılan marixuana və 1 kq-dan artıq narkotik tərkibli maddə olan həşiş qətranı aşkar edilərək götürülüb.
Eyni zamanda həmin mənzildə üzərində heç bir qeydiyyat sənədi olmayan İran vətəndaşının olduğu müəyyənləşib. Əməliyyat tədbirləri çərçivəsində Səməd Vurğun küçəsi 91 ünvanına da baxış keçirilib. Evin zirzəmisindən daha 2 kq 715 qram həşiş qətranı aşkar edilərək götürülüb. İstintaq tədbirləri nəticəsində Əhliman İmanzadə İran İslam Respublikası vətəndaşı olan 38 yaşlı Şəfəqniyya Əkbər ilə qabaqcadan əlbir olaraq dövlət sərhəddindən kənar, ümumi çəkisi 3 kq 751 qram çəkidə həşiş qətranını qaçaqmalçılıq yolu ilə, tamah məqsədilə əldə etdiyi məlum olub.
