Yaponiyanın Baş naziri Fumio Kisida Rusiya ilə sülh müqaviləsi bağlamaq perspektivlərini müzakirə etmək üçün heç bir şərait görmədiyini açıqlayıb.
TASS xəbər verir ki, bu barədə o, dekabrın 2-də parlamentdə müzakirələr zamanı deyib.
Kisida çıxışında qeyd edib ki, Yaponiya-Rusiya münasibətlərində vəziyyət son dərəcə çətin olaraq qalır:
“Bununla belə, biz ərazi probleminin həlli və sülh müqaviləsinin bağlanması istiqamətindəki kursu qətiyyətlə davam etdirəcəyik”.
Qeyd edək ki, Yaponiya Kuril zəncirinin dörd cənub adasınalarına – İturup, Şikotan, Kunaşir və Habomaiyə İkinci Dünya müharibəsinin sonundan – Sovet İttifaqı tərəfindən ilhaq edildikdən bəri iddia edir. 1956-cı ildə Moskva və Tokio hərbi əməliyyatların dayandırılması haqqında bəyannamə imzalayıblar, lakin sülh müqaviləsi heç vaxt bağlanmayıb.
Yapon diplomatiyası 2003-cü ilə qədər adaları rəsmi olaraq "qanunsuz işğal edilmiş", 2012-ci ilə qədər isə "dədə-baba torpaqları" adlandırırdı. 2012-ci ildən hökumət Rusiya ilə kompromis əldə etmək ümidi ilə bu cür dildən yayınıb.
Yaponiya 1956-cı il Adalar Bəyannaməsinə qayıtmağa hazır idi. Həmin sənəddə SSRİ iki ölkə arasında sülh müqaviləsi imzalandıqdan sonra Habomai və Şikotan adalarının Yaponiyaya qaytarılmasına razılıq verib. 2019-cu ildə Yaponiyanın Baş naziri Sindzo Abe Kuril adaları ilə bağlı məsələyə son qoyacağına and içdiyini deyib. Lakin onun dövründəki danışıqlar heç bir nəticə verməyib.
Fevralın sonunda Yaponiya Xarici İşlər Nazirliyinin departament direktoru Cənubi Kuril adalarının işğal olunduğunu bildirib. Daha sonra Yaponiyanın xarici işlər naziri Yosimasa Hayasi parlamentdəki çıxışında həmin bölgəni “əzəli yapon ərazisi” adlandırıb. O, ayrıca mətbuat konfransında adaların “qanunsuz işğal olunduğunu” vurğulayıb. Bundan sonra rəsmi Moskva martın 21-də sülh danışıqlarını dayandırdığını açıqlayıb.
.
