Araşdırmaçı jurnalist Cavanşir Həsənli keçmiş Ekologiya və Təbii Sərvətlər naziri Hüseynqulu Bağırovun ailə üzvlərinin Avropa ölkələrində, Kiprdə və Türkiyədə malik olduğu şirkətlər və daşınmaz əmlak barədə araşdırma aparıb.

Jurnalistin sosial şəbəkədə yaydığı araşdırmasında keçmiş nazirin yaxınlarının malik olduğu şirkətlərin adları təqdim olunur:

– "NORDFIELDS HOSPITALITIES LTD” – İngiltərə

– "NORDFIELDS INVESTMENTS LIMITED” – İngiltərə

– "STAMINA INVESTMENTS LIMITED” – İngiltərə

– "WELGEAR INVESTMENTS LIMITED” – Kipr Respublikası

– "STS TURİZM VE OTELCİLİK İNŞAAT LİMİTED” – Türkiyə

– "DEREAN LIMITED” – İngiltərə

– "LIEGENSCHAFTSVERWERTUNGS GmbH” – Avstriya

– "WU IMMO CENTER GMBH” – Almaniya

– "REANDER LIMITED” – İngiltərə

– "ROMERSTAL INVESTMENTS LIMITED” – İngiltərə

– "LLOYD MCKENZIE LIMITED” – İngiltərə

– "WU TRAINING CENTRE UK LTD” – İngiltərə

– "TURNKEY SOLUTIONS LIMITED” – İngiltərə

– "ISLA INVESTMENT, S.R.O”. – Çexiya


Hüseynqulu Bağırovun ailəsinə məxsus "NORDFIELDS MANAGEMENT LIMITED” şirkəti 2015-ci ilin iyunun 15-dən fəaliyyətdədir. İngiltərə Ədliyyə Nazirliyindən SC507502 saylı şəhadətnamə alıb. Şirkət Hüseynqulu Bağırovun qızı – 1989-cu il, iyul təvəllüdlü Sevinc Bağırovanın adına rəsmiləşdirilib. Fəaliyyət sahəsi maliyyə menecmentliyi göstərilir.

Sevinc Bağırovanın İngiltərədəki evi i85-87, Borough High Street, London ünvanında yerləşir. Söhbət hansısa bir mənzildən yox, mülkiyyət olaraq satın alınmış iri binadan gedir.

Hüseynqulu Bağırovun qızı Sevinc Bağırovanın adına açdığı daha bir şirkət – "NORDFIELDS HOSPITALITIES LTD” də 2015-ci ilin iyunun 3-də Birləşmiş Krallıqda qeydiyyatdan keçib.

Yəni Bağırovlar İngiltərədə bir gündə iki şirkət açıblar.

"NORDFIELDS HOSPITALITIES LTD” SC507488 saylı qeydiyyat şəhadətnaməsi alıb. Hal-hazırda da fəaliyyət göstərir. Qeydiyyat ünvanı: 85-87, Borough High Street, London, England

Bu şirkət vasitəsilə Bağırovlar ailəsi 2015-ci ilin oktyabrın 9-da Şotlandiyanın Qlazqo şəhərində Avropanın məşhur sanatoriyalarından olan "Buchanan Arms Otel”i alıb. Otel 3 ulduzlu olsa da, müalicə və istirahət üçün yaxşı təmin olunub. Sanatoriyanı Sevinc Bağırova idarə edir.


Keçmiş nazirin ailəsinə məxsus "STAMINA INVESTMENTS LIMITED” isə bu şirkətlərdən 3 ay əvvəl, – 2015-ci il martın 5-də qeydiyyatdan keçib. Şəhadətnamə nömrəsi: 09471905. Ünvan isə eyni olub: 85-87, Borough High Street, London, England. Bu şirkət də Sevinc Bağırovanın adına olub.

Bağırovlar ailəsi "STAMINA INVESTMENTS LIMITED” vasitəsilə Londonda bir neçə daşınmaz əmlak alışını həyata keçirib və 23 Avqust 2016-cı il tarixdə onu qapadıblar.

Hüseynqulu Bağırovun İngiltərə sevdasına əlavə olunan növbəti şirkət "NORDFIELDS PROPERTIES LIMITED”-dir. Şirkət SC444402 saylı şəhadətnamə ilə 2015-ci ilin mayın 7-də Londonda qeydiyyatdan keçib. Ofisi Bağırovlara məxsus sanatoriyada yerləşir. Daşınmaz əmlak alqı-satqısı və icarəsi ilə məşğuldur.

Şirkət ilk əvvəl 6 şəxsin ortaqlığı ilə qeydiyyatdan keçib. Bunlar Hüseyqulu Bağırovun oğlu, 1979-cu il təvəllüdlü Lətif Bağırov, 1965-ci il təvəllüdlü Mavritaniya vətəndaşı Vedanund Haurdnur, artıq adı sizə bəlli olan Sevinc Bağırova, 1945-ci il təvəllüdlü İngiltərə vətəndaşı , John William Buick, Qərb Universitetinin vitse-prezidenti, Hüseynqulu Bağırovun özündən 3 yaş kiçik olan bacısı Düriyyə Nuriyevadır.

29 noyabr 2017-ci ildən bəri direktor vəzifəsini də Hüseynqulu Bağırovun oğlu icra edir.

Lətif Bağırov Londona hələ 14 il əvvəl ayaq açıb və ilk dəfə İngiltərədə 2005-ci ilin aprelin 20-də "TURNKEY SOLUTIONS LIMITED” şirkətini qeydiyyatdan keçirib. 05430122 saylı qeydiyyat şəhadətnaməsi alan şirkət OFFICE 96, 1535 MELTING POINT, 5 FIRTH STREET, HUDDERSFIELD ünvanında fəaliyyət göstərib və növbəti il oktyabrın 17-də qapadılıb. Bu şirkət vasitəsilə Bağırovlar Londonda ilk daşınmaz əmlaka sahib olublar. Şirkəti Mixail Aleksandroviç Zhabın adlı milliyyətcə rus olan İngiltərə vətəndaşı idarə edib.

Hüseynqulu Bağırovun İngiltərədəki ailə şirkərlərindən daha biri "NORDFIELDS INVESTMENTS LIMITED” 2013-cü ilin iyunun 5-də 08557695 saylı şəhadətnamə ilə qeydiyyatdan keçib. Ofisi Londonda, Hatton Garden 63-66, Fith Floor Suite 23 ünvanında yerləşir. Bu şirkət də daşınmaz əmlakın alışı və icarəsi ilə məşğuldur. Şirkət sabiq nazirin bacısı Düriyyə Nuriyeva (şirkətin direktoru) və Sevinc Bağırovanın adına rəsmiləşdirilib.

Düriyyə Nuriyeva hələ 2012-ci ildə Londonda "WESTERN EDUCATIONAL CONSULTANCY LIMITED” şirkətini açıb (qeydiyyat şəhadətnaməsi 08187544). Bir neçə əmlak aldıqdan sonra 31 mart 2015-ci ildə qapadılıb. Bundan bir neçə ay sonra Hüseynqulu Bağırov Birləşmiş Krallıqda daha bir şirkət açıb.

"ROMERSTAL INVESTMENTS LIMITED” 2015-ci ilin 10 avqust tarixində 09725150 saylı lisenziya ilə fəaliyyətə başlayıb. Qeydiyyat ünvanı: 85-87 Borough High Street, London, England. Keçən il yanvarın 27-də qapadılıb.

Bağırovlar ailəsinə məxsus daha bir şirkət – "REANDER LIMITED” 2011-ci ilin dekabrın 1-də Londonda qeydiyyata Hüseynqulu Bağırovun ailə üzvü, Qərb Universitetinin dekanı, 1957-ci il təvəllüdlü Liana Bağırovanın və qızı Sevinc Bağırovanın adına açılıb və 07867199 saylı lisenziya ilə fəaliyyət göstərib. Ofisi Bağırovlara məxsus Borough High Street 30, London, United Kingdom ünvanında yerləşib. Bu bina Bağırovların mülkiyyətində olsa da, Londonun tarixi binalarından biri kimi mühafizə olunur.
"REANDER LIMITED”-in qeydiyyatından bircə gün sonra Bağırovlar Londonda ailənin hər iki üzvünün təsisçiliyi ilə "DEREAN LIMITED” adlı növbəti şirkəti qeydiyyatdan keçiriblər (lisenziya nömrəsi 07869770). "DEREAN LIMITED” özündən bir gün əvvəl açılan şirkətlə eyni küçədə, Borough High Street 85-87 ünvanında fəaliyyət göstərib. Hər iki şirkət ardıcıllıqla, 2016-cü ilin may və iyun aylarında ləğv edilib.
Bağırovların ailəsinə aid "LLOYD MCKENZIE LIMITED” şirkəti (lisenziya nömrəsi 08187563) 2012-ci ilin 22 avqustundan 2015-ci ilin 21 mart tarixinə qədər fəaliyyət göstərib. Bu şirkət də Borough High Street 85-87, London ünvanında fəaliyyət göstərib.
Bağırovlar ailəsinə məxsus "WU TRAINING CENTRE UK LTD” şirkəti də nazirin bacısı Düriyyə Nuriyevanın adına Londonda 10 dekabr 2014-cü ildə qeydiyyatdan keçib və 09348729 saylı şəhadətnamə ilə 31 may 2016-cı il tarixə qədər Borough High Street 85, London, England ünvanında fəaliyyət göstərib.
Britaniya Krallığı Hüseynqulu Bağırovun Azərbaycandan daşıdığı sərvətlərin yeganə ünvanı deyil. O, Çexiyaya da böyük maraq göstərib və 2011-ci il aprelin 13-də Praqada ailə şirkəti təsis edib. "Isla Investment, s.r.o.” 200 min kron nizamnamə kapitalı ilə qeydiyyata alınıb. Lisenziya nömrəsi: 24835951. Ünvan: Husitská 107/3, Žižkov (Praha 3), 130 00 Praha.
Təsisçilər:

Lətif Bağırov – 10 % (Azərbaycan R., F.İbrahimbəyov 12/160)

Aliya Nuriyeva – 10 % (Azərbaycan R.,F.İbrahimbəyov 12/194)

Sevinc Bağırova – 10% (Azərbaycan R., F.İbrahimbəyov 12/160)

Düriyyə Nuriyeva -35 % (Azərbaycan R., F.İbrahimbəyov 12/194)

Liana Bağırova – 35 % (Azərbaycan R., F.İbrahimbəyov 12/160)

Hüseynqulu Bağırov Kiprə də maraq göstərib və sərvətinin bir qismini bu ölkəyə yatırıb.

"WELGEAR INVESTMENTS LIMITED” 2010-cu il martın 23-də Nikosiyada qeydiyyatdan keçib (lisenziya nömrəsi HE264613). 9 ildən bəridir ki, fəaliyyətdədir.

Ünvanı: Sofouli 2, CHANTECLAIR BUILDING, Floor 8, Flat 801 Nikosiya Kipr. Şirkət nazirin bacısının adına qeydiyyatdan keçirilib.

Bağırovların ailə biznesi Almaniya və Avstriyaya da ayaq açıb. Belə ki, Hüseynqulu Bağırovun oğlu və bacısı 2006-cı ilin sentyabrında Avstriyada "Liegenschaftsverwertungs GmbH” şirkətini qeydiyyatdan keçiriblər (qeydiyyat nömrəsi FN 283461 f). Şirkət paytaxt Vyanada Hütteldorferstraße 110 ünvanında yerləşir. Bağırovlar bu ölkədə də kifayət qədər bahalı mülk alıblar. Hazırda şirkətin hissələrinin 94 faizi Lətif Bağırovun Almaniyadakı "WU Immo Center GmbH” şirkətinə, 6 faizi isə nazirin bacısı Düriyyə Nuriyevaya məxsusdur.

Almaniyada qeydiyyatdan keçirilmiş "WU Immo Center GmbH” şirkəti (qeydiyyat nömrəsi HRB 26689) 2016-cı il iyunun 11-dən fəaliyyətdədir və Wuppertal şəhərində Hofkamp 71 ünvanında çoxmərtəbəli bina alıb.

Binanın hər kv m.-i 8.25 avroya icarəyə verilir. Düriyyə Nuriyeva əvvəllər bu şirkətə şərik olsa da, 2017-ci ilin iyul ayından bəri Lətif Bağırov onun şəriksiz sahibidir. Şirkətin nizamnamə kapitalı 25 min avrodur. Şrkətin Almaniyadakı aktivlərinin qiyməti isə 6 milyon 170 min avro dəyərindədir.

Bağırovlar Türkiyədə də şirkət açıblar. "STM Turizm Otelçilik və İnşaat Limited” İstanbulda BARBAROS MAH. LEYLAK SOK. AĞAOĞLU ANDROMEDA C4 BLK.D.50 ATAŞEHİR ünvanında yerləşir. 4 May 2011-ci ildən turizm və otelçilik sahəsində fəaliyyət göstərir. Çoxsaylı apartmanlara və pansionatlara sahibdir.

Nizamnamə kapitalı – 123 min 456 TL-dir. Ticarət cə Sənaye Odasında qeydiyyata alınıb və 1234567890 qeydiyyat nömrəsi alıb. "STM Turizm, Otelçilik və İnşaat Limited”-in təsisçiləri Lətif Bağırov, Sevinc Bağırova, Liana Bağırova, Düriyyə Nuriyeva və Hüseynqulu Bağırovun bibisi qızı Aliyə Nuriyevadır.(BAKU.WS)


.