Əmək və Əhalinin Sosial Müdafiəsi Nazirliyinin rüşvət almaqda təqsirləndirilən sabiq aparat rəhbəri Əjdər Cəbiyevin (Əjdər Ol) cinayət işi üzrə məhkəmə istintaqı başlayıb.
Bu gün Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə dövlət ittihamçısı Eldar Həmzəyev ittiham aktını elan edib.
İttihamda göstərilib ki, Cəbiyev Əjdər Feyzulla oğlu Səlim Müslimovun nazir olduğu dövrdə nazirliyin aparat rəhbəri işləyib. Təqsirləndirilən Əjdər Cəbiyev 2004-cü ildən 2013-cü ilə qədər Dövlət Sosial Müdafiə Fondunun, 2013-cü ildən 2018-ci ilə qədər isə Əmək və Əhalinin Sosial Müdafiəsi Nazirliyi aparatının rəhbəri vəzifəsinin icrası zamanı təkrar olaraq qabaqcadan əlbir olmuş bir qrup şəxs halında külli miqdarda məbləğ təşkil edən vəsaiti rüşvət qismində əldə edib.
Təqsirləndirilən şəxs göstərilən əməlləri törətməklə öz vəzifə səlahiyyətlərindən sui-istifadə edib. Əjdər Cəbiyev Dövlət Sosial Müdafiə Fondunun rəhbəri olmuş Səlim Müslümovla əlbir olan bir qrup səxs vasitəsi ilə xidməti vəzifələri zamanı laqeydlik müqabilində bir neçə nəfərdən rüşvət və mənimsəmə yolu ilə ümumilikdə 500 min manatdan artıq vəsait əldə edib.
Bundan başqa, Əjdər Cəbiyev Səlim Müslümov və digər şəxslərlə əlbir olaraq 2014-cü ildə Əmək Əhalinin Sosial Müdafiəsi Nazirliyinin tabeliyində obyektlərin tikilməsi üçün qulluq mənafeyindən istifadə edərək Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlil olmuş şəxslərin və şəhidlərin sosial-məişət şəraitlərinin yaxşılaşdırılması üçün Gəncə və Mingəçevir şəhərlərində mənzillərin alınması ilə bağlı dövlət büdcəsindən ayrılmış külli miqdarda vəsaitin mənimsəmə yolu ilə ələ keçirilməsinə nail olub. Belə ki, həmin mənzillərin alqı-satqısı zamanı satan şəxslərə dövlət büdcəsindən ayrılmalı olan məbləğdən artıq vəsait köçürülərək müəyyən hissəsini onlara çatdırılmasını ilə bağlı razılıq əldə olunub. Ümumilikdə Gəncə və Mingəçevir şəhərlərində mənzillərin satın alınması üçün nəzərdə tutulmuş məbləğdən 262 min 760 manat dövlət vəsaiti köçürülərək nağdlaşdırılmasına nail olunub.
İttihamda qeyd olunub ki, təqsirləndirilən şəxs əldə olunmuş məbləği 2017-ci ilin sentyabr ayının sonlarında Əmək və Əhalinin Sosial Müdafiəsi Nazirliyinin inzibati binasında Səlim Müslümovun göstərişlərini icra edən nazirliyin nəzdində tikilməkdə olan obyektlərin müdiriyyətinin sabiq direktoru Əzizov Natiq Bayram oğlunun vasitəsi ilə mənimsəmə yolu ilə talamaqda təqsirli bilinib.
Beləliklə Cəbiyev Əjdər oğluna göstərilən halları nəzərə alaraq Cinayət Məcəlləsinin 179.3.2, 308.2, 311.3.1, 311.3.2 və 311.3.3-ci maddələri ilə yekun ittiham verilib.
Əjdər Cəbiyev məhkəmədə sərbəst ifadə verib.
Təqsirləndirilən şəxs ifadəsində verilmiş ittihamlarla özünü təqsirli bildiyini deyib: "İstintaq zamanı verdiyim ifadəni təsdiq edirəm. Heç nəyə etiraz etmirəm. Yalnız onu demək istəyirəm ki, Səlim Müslümovla əlbir olmamışam, onun heç nədən xəbəri olmayıb. Əldə etdiyim pulları isə cari xərclərə ödəmişəm”.
Daha sonra prosesdə cinayət işi üzrə şahid qismində tanınan şəxslər ifadə verib.
Şahidlər ifadələri zamanı Dövlət Sosial Müdafiə Fondunda və Əmək və Əhalinin Sosial Müdafiəsi Nazirliyində müvafiq vəzifələrə təyin olunmaq üçün təqsirləndirilən şəxsə müxtəlif məbləğlərdə pul verdiklərini deyiblər.
Şahid ifadələri zamanı məlum olub ki, Əjdər Orucov müxtəlif vəzifələr düzəlmək üçün ayrı-ayrı şahidlərdən 2 min manatdan 120 min manata qədər pul alıb.
Prosesdə Dövlət Sosial Müdafiə Fondunun Saatlı Saatları filialında müdir müavini işləmiş Seyidrəsul Abbasov da ifadə verib. Şahid bildirib ki, onu işə Səlim Müslümov təyin edib, bir müddət işlədikdən sonra isə vəzifəsindən azad olunub. Şahidin əvvəlki ifadəsi elan olunan zaman məlum olub ki, işə düzəlmək üçün 2 min manat pul verib.
Növbəti proses yanvarın 19-a təyin olunub.
Qeyd edək ki, Əjdər Cəbiyev Dövlət Təhlükəsizliyi Xidmətinin əməkdaşları tərəfindən saxlanılıb. O, külli miqdarda rüşvət almaqda ittiham olunur. Onun barəsində istintaq orqanının təqdimatı əsasında Səbail rayon Məhkəməsi tərəfindən həbs qətimkan tədbiri seçilib.
Ə. Cəbiyev Azərbaycan Yazıçılar Birliyinin üzvü, Əjdər Ol təxəllüsü ilə tanınan şair-publisistdir.
Əjdər Ol Səlim Müslimovun nazir olduğu dövrdə nazirliyin aparat rəhbəri işləyib.
Y. Stoltenberq qeyd edib ki, Rusiya qoşunları Moldova, Gürcüstan və Ukraynanın razılığı olmadan bu ölkələrin ərazilərindədir: “Bu qüvvələr həmin ölkələr tərəfindən qəbul edilmir. Biz bu gün görüşdə Rusiyanı qoşunlarını bu ölkələrin ərazisindən geri çəkməyə çağırdıq. Rusiya hərbi qüvvələrini bu ölkələrdən geri çəkməli və həmin ölkələrin ərazi bütövlüyünü tanımalıdır”.
